வால்பேப்பர்

 Wallpaper

இணையத்தில் உலாவுகையில், கண்ணில் அகப்படும் வால்பேப்பர்களைச் சேகரிக்கும் பழக்கம் உண்டு. வால்பேப்பர்கள் என்றால் அரைகுறை ஆடையில் பெண்கள் அல்ல. பிரபஞ்சம், இயற்கையில் அமைந்த அரூப கணங்கள், மனிதர்கள் செயற்கையாய் அமைத்த கணங்களில் அர்த்தமுள்ளவைகள், இப்படி. சில, அமெரிக்கர்கள் தங்கள் தொலைநோக்கிகளில் படம் பிடித்தவை. சிலவற்றை எடுத்தது யாரென்று தெரியவில்லை. நான் இவற்றை எடுக்கவில்லை என்பதைச் சொல்லிக்கொள்கிறேன்.

இப்போது சேர்ந்திருப்பவைகளை இங்கே தருகிறேன். பிடித்திருந்தால் பயன்படுத்திக்கொள்ளுங்கள்.

நிலா (Moon), சுக்கிரன் (Venus) மற்றும் குரு (Jupiter) ஆகிய கிரகங்கள் ஒன்றாக ஒருங்கே தெரியும் காட்சி. சில சமயங்களில் தமிழ்ப் படங்களில் 'எட்டு கிரகங்களும் ஒன்றாக வரும் நேரம், பிறப்பான்..அவன் அழிவின் உருவாக இருப்பான்' என்றெல்லாம் காட்டுவார்கள். அந்த வசனத்தைக் கேட்டால், உணர்ச்சி மயமாக இருக்கும். உண்மையில் எட்டு கிரகங்களும் நேர் கோட்டில் வர வாய்ப்பே இல்லை. காரணம் ஒவ்வொரு கிரகமும் சூரியனைச் சுற்றும் தளம் (orbital plane) வேறு.

Galactic Arm பின்னணியில் எகிப்தின் பிரமிடு. பிரமிடுகளின் alignment ம் ஒளியின் வேகமும் ஒரே எண்கள் என்கிற தகவலுடன் இப்படம் பார்க்க எப்படி இருக்கிறது என்று நண்பர்கள் சொல்லலாம்.

Tsuchinshan வால் நட்சத்திரம் ஜப்பான் அருகே.

பூமி, அதன் மீது தெரியும் நிலா, பின்னால் Galactic Arm.

கடைசியாக, இது கொஞ்சம் அச்சமூட்டும் படம் தான். விண்களத்துடன் தன்னைப் பிணைக்க எதுவும் இன்றி விண்வெளி வீரர் ப்ரூஸ் செய்த விண்வெளி நடை(spacewalk) தான் இது. இப்படி spacewalk செய்வதில் உள்ள அபாயம் பற்றிப் புரிந்துகொள்ள வேண்டுமானால், Sandra Bullock நடித்த Gravity திரைப்படம் பாருங்கள். திரைப்படத்தில் மேட் கோவால்ஸ்கி இப்படித்தான் தொலைந்து போவார். பாவமாக இருக்கும். ஆனால், அந்த நோடியை அவர் ஏற்றுக்கொண்ட விதம் அருமையாக இருந்தது.

Halloween Comet

 Halloween comet

வரும் அக்டோபர் 31ம் திகதி அமெரிக்காவில் Halloween. தெருவெங்கும் பேய்கள், பூதங்கள், ஜாம்பிக்கள் குறித்த பொம்மைகள் வைக்கத்துவங்கியிருக்கிறார்கள். நம் சூரியக்குடும்பத்துக்கே Halloween இருப்பது தெரியுமா? பெயர் கூட இருக்கிறது. 

Halloween comet.

வேடிக்கையாக இருக்கிறதல்லவா?

ATLAS என்பது ASTEROID TERRESTRIAL-IMPACT LAST ALERT SYSTEM என்பதாகும். அதாவது பூமி மேல் மோத இருக்கும் விண்கற்களை முன்னரே கண்டுபிடித்துச் சொல்லும் கண்காணிப்பு மையம். இதனை, நாசாவுடன் இணைந்து நடத்துகிறது ஹவாய் பல்கலைகழகம்.

இந்தக் கண்காணிப்பு மையம் ஒரு விண்கல்லைக் கடந்த செப்டம்பரில் கண்டுபிடித்தது. பூமி மீது மோதிவிடுமோ என்ற பயம் தான். வேறென்ன? கண்டுபிடித்ததுமே, இது பூமி மீது மோதிவிடுமோ என்ற பயம் எல்லோரையும் தொற்றிக்கொண்டது. அப்போது இதற்கு வைக்கப்பட்ட பெயர் c/2024 s1 என்பதாகும். இதைக் கண்டுபிடித்தபோதே இது ஒரு பெரிய விண்கல் உடைந்ததினால் உருவான சிறு சிறு பாறைகள் என்பது தெரியவந்தது. இது போன்ற பாறைகள் சூரியனைச் சுற்றி வரத்துவங்கிவிடும். அவற்றுள் சிற்சில பூமி மீதும் மோத வாய்ப்பதிகம் தான்.

இதைப் போன்ற இன்னொன்று தான் Tsuchinshan வால் நட்சத்திரம். அது அக்டோபர் மாதம் முழுவதும் வெறும் கண்களுக்கே மங்கலாய்க் காட்சி தந்தது நினைவிருக்கலாம். 

இப்போது செய்தி என்னவென்றால், இந்த C/2024 S1 விண்கல் சூரியனைச் சுற்றி வரும் என்று எதிர்பார்க்கப்பட்ட நிலையில், சூரியனின் ஈர்ப்பு விசையை விட்டு வெளியேற முடியாமல், அதனுள் விழுந்து சுக்கு நூறாகி அப்சர்வேட்டரிக்காரர்கள் வயிற்றில் பாலை வார்த்திருக்கிறது. இனி இந்த விண்கல்லை track செய்யவேண்டாம் அல்லவா? மாதா மாதம் ஒரு விண்கல் வந்து பீதியைக் கிளப்பினால் வேறு என்னதான் செய்வார்கள் அவர்களும்?

நீங்கள் படத்தில் காண்பது C/2024 S1 விண்கல்லின் core சூரியனின் வெப்பத்தைத் தாங்க முடியாமல் இளகி உடைந்து சுக்கு  நூறாகும் காட்சி தான். இப்படி எல்லா கற்களும் சுக்கு நூறாகிவிட்டால் நல்லதுதான் இல்லையா? ஆனால், அதற்கு வாய்ப்பில்லை. இப்போதைக்கு பூமியின் மீது மோத வரும் விண்கற்களைத் தாக்கி அழிக்க நம்மிடம் தொழில் நுட்பம் தேவை. அப்படியே தாக்கி அழிக்க முயற்சி எடுத்தாலும், அந்தத் தாக்குதலில் அந்தக் கல் பல துண்டுகளாகி மீண்டும் பூமியிலேயே வந்து விழுவதற்கும் வாய்ப்பதிகம்.

கோடிக்கணக்கான டாலரை செவ்வாய்கிரக ஆராய்ச்சிக்கு நேர்ந்துவிடத்தான் வேண்டுமா? அதற்கு பதில் பூமியைப் பாதுகாக்கக் செலவிடலாமே என்பவர்களுக்கு இந்தப் பதிவு. எல்லா விண்கற்களும் C/2024 S1 போன்றிருக்காது. இதை உலக நாடுகள் உணர்ந்திருப்பதால் தான் சூரியக்குடும்பத்திலேயே வேறெங்கெல்லாம் பரவலாம் என்கிற தேடல் பரவலாக முக்கியத்துவம் பெறுகிறது. பார்க்கப்போனால் அதில் நியாயம் இருக்கிறது என்று தான் நானும் நினைக்கிறேன்.

 

விதைகளின் பயணம் - மொழிபெயர்ப்புச் சிறுகதை

 ஒரு அறிவியல் புனைவு மொழிபெயர்ப்புச் சிறுகதை: -

விதைகளின் பயணம்:

https://solvanam.com/2024/10/27/%e0%ae%b5%e0%ae%bf%e0%ae%a4%e0%af%88%e0%ae%95%e0%ae%b3%e0%ae%bf%e0%ae%a9%e0%af%8d-%e0%ae%aa%e0%ae%af%e0%ae%a3%e0%ae%ae%e0%af%8d/

ஆனந்த விகடனில் எனது கவிதை 'கைத்தட்டல்கள்'

 30.10.2024 தேதியிட்ட இந்த வாரம் ஆனந்த விகடன் இதழில் கவிதைகளுக்கான சொல்வனம் பகுதியில் எனது 'கைத்தட்டல்கள்' கவிதை வெளியாகியிருக்கிறது என்பதை மகிழ்ச்சியுடன் தெரிவித்துக்கொள்கிறேன். எனது கவிதையைத் தெரிவு செய்த ஆனந்த விகடன் ஆசிரியர் குழுவுக்கு எனது நன்றிகளை உரித்தாக்குகிறேன்.

இதோ உங்கள் பார்வைக்கு எனது கவிதை.

இன்டர்ஸ்டெல்லார் - தெரியாத தகவல்கள்

 புரிந்துகொள்ள மிகவும் சிக்கலான படம் என்றால் அது Interstellar. எனக்கு மிகவும் பிடித்தமான அறிவியல் புனைவுத் திரைப்படமும் கூட. என்னைக்கேட்டால் உண்மைக்கு மிக நெருக்கமாக எடுப்பது என்பார்களே அது போல மிகவும் நெருக்கமாக எடுக்கப்பட்ட படம் இன்டர்ஸ்டெல்லார். அதுகுறித்து சில புதிய தகவல்கள் 

1. இந்தத் திரைப்படத்திற்கு முதலில் எழுதப்பட்ட க்ளைமாக்ஸ், கூப்பர் வார்ம்ஹோலில் விழுவது தானாம். அதன் பிறகே, கூப்பர் தன் மகளின் நினைவுக்கிடங்கல் புகுந்து சில வேலைகளைப் பார்ப்பதாக எழுதப்பட்டிருக்கிறது. ஆனால், உண்மையில் இந்த இடத்தை சற்றே சொதப்பிவிட்டார்கள் என்பதே என் வாதம். இதன் படி, கூப்பர் தன் மகளுக்கு மார்ஸ் கோட் மூலமாகக் கொடுத்த தகவலின் அடிப்படையில் தான் கூப்பர் அந்த ரகசிய இடம் செல்வார், அதன் பிறகே விண்வெளி செல்வார். ஆக விண்வெளி செல்வதற்கு அவரை அவரே தூண்டிக்கொண்டதாகத்தான் அர்த்தமாகிறது. பிறகு ஏன் அழுகை?

2. நோலன், டாக்டர் மேனின் கதைக்கு ஒரு prequel எழுதி அதை காமிக் நாவலாக வெளியிட்டிருக்கிறார்.

3. இந்தத் திரைப்படத்தில் முதல் சில காட்சிகளில் வரும் தூசிகளால் ஆன புயலுக்கு cardboard ஐ தூளாக்கிப் பயன்படுத்தியிருக்கிறார்கள்.

4. இந்தத் திரைப்படத்தில் வரும் TARS ஐ சினிமாவுக்கென்று டம்மியாக உருவாக்காமல் உண்மையாகவே உருவாக்கியிருக்கிறார்கள்.

5. ஜொர்டான் மற்றும் ஹங்கேரியில் திரைப்படமாக்கப்ப 'Martian' திரைப்படம் போல், interstellar திரைப்படத்தைப் கனடாவில் ஷூட் செய்திருக்கிறார்கள். நான் வசிக்கும் ஊரான ஜியார்ஜியாவில் எடுக்கப்பட்ட படம் 'Greenland'.

6. இது ஒரு புதுமையான ரெக்கார்டு. இதுவரை மிக அதிகம் முறை சட்டத்துக்குப் புறம்பாக, நகலெடுக்கப்பட்ட படம் interstellar தானாம். மொத்தம் 46 மில்லியன் முறைகள். இது ஜுராசிக் வோர்ல்டு, ஃபூரியஸ் போன்ற திரைப்படங்களையும் விட அதிகம் என்கிறார்கள்.

ஐந்நூறு மீட்டர் அகல தொலைநோக்கி

ஐந்நூறு மீட்டர் அகல தொலைநோக்கி

சீனாவின் FAST தான் உலகின் மிகப்பெரிய தொலை நோக்கி. செல்லமாக 'வானத்தின் கண்' அதாவது 'Sky eye telescope'. இதன் துளை அதாவது aperture சுமார் ஐந்நூறு மீட்டர். (போதுமா!?) இந்தப் படத்தில் பாருங்கள். எத்தனை பிரம்மாண்டமாய் இருக்கிறது? ("இன்னுமா இதையெல்லாம் ப்ளாட்டு போட்டு விக்காம இருக்காய்ங்க?" என்று தானே தோன்றுகிறது?

ஜூன் 14 அன்று சீன ஆராய்ச்சியாளர்கள், இந்தத் தொலை நோக்கியில் வேற்றுக்கிரக வாசிகளிடமிருந்து சமிஞைகளைப் பெற்றதாகத் அறிவித்திருந்தார்கள். 2019ல் ஒன்றும், 2022ல் இரண்டும்.

குறுகிய கட்டு சமிஞைகள் அதாவது narrow-band signals இயற்கையாக உருவாகுவன அல்ல. அவற்றைச் செயற்கையாக யாரேனும்  உருவாக்க வேண்டும். கிடைத்த சமிஞை அப்படிப்பட்டன என்றதும் சீன ஆராய்ச்சியாளர்கள் குழு துள்ளிக் குதித்தது. சமிஞை கிடைத்த அந்தப் பகுதியையே தொடர்ந்து ஆராய்ந்தது. இரண்டு வருடங்கள் ஆராய்ச்சிக்குப் பின்னர் தெரிய வந்திருப்பது moey moey ரகம்.

அந்த சமிஞைகள் வெறும் Radio signal interference தானாம்.

எல்லா குழப்பமும் தொலை நோக்கியின் அளவிலிருந்து தான் துவங்குகிறதாம். இது போன்ற பாரிய தொலை நோக்கிகள் மிகவும் உணர்திறன் மிக்கதாக இருக்குமாம். அதனால் இவைகள் பூமியிலிருந்து வெளிப்படும் சமிஞைகளையே வேற்று கிரகத்திலிருந்து வந்த சமிஞைகள் போல் கண்டுபிடித்து நம்மை ஏமாற்றுகின்றன என்பது இப்போது தெரிய வந்திருக்கிறது. 2022ல் கிடைத்த சமிஞைகளை ஆராய்ந்ததில் இந்தக் கூற்றுடன் ஒத்துப்போவதாகத் தெரிய வந்திருக்கிறது. 

என்னடா வேற்று கிரக உயிர்கள் ஆராய்ச்சியை பிடிச்ச சோதனை என்று தானே நினைக்கிறீர்கள்?

சரி. இந்தத் தொலை நோக்கியை சிறிதாக வைத்தால் பிரச்சனை தீர்ந்துவிடும் என்றும் நினைப்பதற்கில்லை. விண்வெளியிலிருந்து வரும் சமிஞை அளவு மிகவும் குறைவு. விண்வெளியிளேயே மிகவும் வடிகட்டப்பட்டுத்தான் நம்மை வந்தடைகின்றன. அதிக அளவிலான சமிஞைகள் கிடைத்தால், விஸ்தீரணமாக ஆராய முடியும் என்பதற்காகத்தான் தொலை நோக்கியின் அளவைப் பெரிது படுத்த வேண்டி இருக்கிறது. இப்போது அதிலும் சிக்கல். சிக்கல் என்னவென்றால், நாம் உருவாக்கும் சமிஞைகளையே நாம் முதலில் வடிகட்ட வேண்டும். இதைச் செய்வது எப்படி என்று தலையைப் பிய்த்துக் கொண்டிருக்கிறார்கள் ஆராய்ச்சியாளர்கள்.

இத்தோல்விகள் மறைமுகமாக உணர்த்தும், fermi paradoxக்கு சொல்லப்படும் விளக்கங்களுள் ஒன்று: ஒரு இனம் வேற்று கிரக உயிர்களைக் கண்டுபிடிக்கும் முன்னரே அழிவை சந்தித்துவிடுவது.

இப்போதைக்கு, ஒன்றை ஆணித்தரமாகச் சொல்ல வேண்டுமானால், இப்படிச் சொல்லலாம். 

"எல்லோரும் இன்புற்று வாழ மட்டுமே இந்த உலகம். எல்லோரிடமும் அன்பு செய்யுங்கள்."

பிக் பாஸ் - so far

 இன்றைய நாளை "தினம் தினம் எதிர்பாராத திருப்பங்களுடன்..." என்று சொல்லி முடிக்கிறார் பிக் பாஸ்.

முதல் வாரத்தில் பட்டிமன்றம் டாஸ்கில் பெண்கள் அணி சார்பில் ஜெயித்தது முத்து.

இரண்டாம் வாரத்தில் பஸ்ஸர் டாஸ்கில் பெண்கள் அணி சார்பில் ஜெயித்தது தீபக். ஆண்கள் பஸ்ஸரை அடிக்கப் பாய்ந்த வேகத்தைப் பார்த்தால், ஆண்கள் மட்டுமே பங்கு பெறும் போட்டி போல் தோன்றாமல் இல்லை.

இந்த வாரத்தில் உணவுக்கான டாஸ்கில் பெண்கள் அணி சார்பில் ஜெயித்தது ஜெஃப்ரீ. ஜெஃப்ரீ மட்டும் ஜெயிக்கவில்லை என்றால் பெண்கள் அணிக்கு அந்த இரண்டாயிரம் கூட கிடைத்திருக்காது.  இதை சவுன்ட் என்கிற செளந்தர்யா, ரஞ்சித்திடம் சொல்லவே செய்துவிட்டார். ஜெஃப்ரீ மட்டும் ஜெயித்திருக்காவிட்டால் சோத்துக்கு சிங்கிதான் என்று...

அடுத்தடுத்த வாரங்களில், பெரும்பான்மையான டாஸ்குகளில் பெண்கள் அணி சார்பில் வென்று தருபவர் ஆணாகத்தான் இருப்பார் என்பதை முன்தீர்மானமாகச் சொல்லிவிடமுடியும்.

இப்படி ஜல்லி அடிக்கும் பிக் பாஸில் ஒரே ஆறுதல், வார இறுதிகளில் வரும் விஜய் சேதுபதி தான். டி20க்கு தோனி விளையாடுவது போல் ஒவ்வொரு பாலையும் சிக்ஸருக்கு விரட்டுகிறார். சிலது ஸ்டேடியத்துக்கு வெளியேயே சென்றும் விடுகிறது.

இதில் என்ன எதிர்பாராத திருப்பங்களுடன்...... தினம் தினம் எதிர்பார்த்த திருப்பங்களுடன் தொடர்கிறது பிக் பாஸ்... ஆண்களா? பெண்களா? என்ற தலைப்புக்கும், டாஸ்க்குகள் நடக்கும் விதத்திற்கும் தொடர்பில்லாமல் எங்கோ எதுவோ துருத்திக்கொண்டே இருக்கிறது.

எனக்கு மட்டும் தான் இப்படியெல்லாம் தோணுதா? யாராவது சொல்லுங்க ப்ளீச்...

வீனஸுக்கு களன் அனுப்பும் சீனா

வீனஸ் கிரகத்திலிருந்து காற்றை பூமிக்கு வரவழைக்க முயற்சிகள் எடுக்கத்துவங்கியிருக்கிறது சீனா. 

பூமியிலும் காற்று மாசடைகிறது. தொடர்ந்து மாசடைந்து கொண்டே போனால் ஒரு கட்டத்துக்கு மேல், பூமி வீனஸ் கிரகம் போல் ஆகிவிடும். வீனஸ் கிரகத்தில் என்ன பிரச்சனை? வீனஸ் கிரகத்தை ஒரு அடர்த்தியான கார்பன் டைஆக்ஸைடு படிமம் மூடியிருக்கிறது. இதனால்  ஊடுறுவும் ஒளி கிரகத்தை விட்டு வெளியேற விடாமல், கிரகத்தின் காற்று மண்டலம் தடுக்கையில், அது கிரகத்தின் வெப்ப நிலையை அதிகரிக்கச்செய்கிறது. இதனால் வீனஸ் கிரகத்தில் எப்போதும் சல்ஃப்யூரிக் ஆசிட் மழை தான்.

பூமிக்கும் அந்த நிலை வரலாம். எது, பூமியை, வீனஸ் கிரகம் ஆக விடாமல் தடுக்கும் புள்ளி என்பதைத் தெரிந்துகொள்ளவும், வீனஸ் கிரகத்தின் காற்று மண்டலத்தை ஆராயும் வீனஸ் கிரகத்துக்கு களன் ஒன்றை அனுப்ப முடிவு செய்திருக்கிறது சீனா.

கேட்கவே பகீரென்று இருக்கிறதல்லவா? கேள்வி என்னவென்றால் செவ்வாய் கிரகத்தில் உலவும் சீனாவின் Zhurong போல இது இருக்காது. வீனஸின் காற்று மண்டலம் ஆசிட் மழை , புயல் வீசக்கூடியது. எந்தக் களனை அனுப்பினாலும் அதனைப் பொசுக்கிவிடும் தன்மை அந்தக் காற்று மண்டலத்துக்கு இருக்கிறது. ஆசிட் மழையில் பொசுங்கிவிடாமல், ஆராய்ச்சிக்குத் தேவையான மாதிரிகளைக் களன் சேமித்துவிட்டு பூமிக்குத் திரும்ப வேண்டும். 

இந்த சவால்களை ஏற்கவும், செய்து முடிக்கவும் சீனாவுக்குத் திறமை இருக்கிறது என்று தான் நம்புகிறேன். ஒரு நாள் சீனா இதனைச் செய்து முடிக்கும். மனித இனத்தின் கவனமின்மை, பொறுப்பின்மை ஆகியவற்றை இந்தப் புண்ணிய பூமி இன்னும் எத்தனை காலம் தான் பொறுக்கும் என்பதற்கு திட்டவட்டமான எண்கள் ஏதேனும் இருக்கிறதா என்பதைத் தெரிந்துகொள்ள நானும் ஆவலாகத்தான் இருக்கிறேன்.

மரணமற்ற வாழ்வு

மரணமற்ற வாழ்வு

ஆம். இப்போது அது தான் பெரும்பணக்காரர்களின் தேடலாக இருக்கிறது. அதை விடவும் கவர்ச்சிகரமான இன்னுமொன்று, என்றென்றைக்கும் இளமை.

அதற்கு எதிரியாகப் பார்க்கப்படுவது என்னவென்று நினைக்கிறீர்கள்? நம் உடல் தான். ஆம். இதற்கு எத்தனை தீனி போடவேண்டி இருக்கிறது? முனுக்கென்றால் ஜலதோஷன் தலைவலி, வயிற்று வலி..அதுவும் இல்லையென்றால் நோய்க் கிருமிகள். இப்படி ஒவ்வொரு நாளும் மிகப்பெரும் செலவும், மெனக்கெடலும் தேடைப்படுகிறது இந்த உடலைப் பாதுகாக்க, பராமரிக்க. 

இந்தத் தொழில் நுட்பத்தை whole brain emulation என்கிறார்கள். 1945ம் ஆண்டுக்குள் இந்தத் தொழில் நுட்பம் பரவலான பயன்பாட்டிற்கு வந்துவிடுமாம். 

ஆனால், இதில் சிக்கல்கள் இல்லாமல் இல்லை. ஒரு சிறிய எலியின் ஒரு க்யூமிக் அளவுள்ள மூளையை வெட்டி எடுத்து அதனுள் சென்று சேரும் தகவல்களை கணிப்பொறியில் சேமிக்க முயன்றிருக்கிறார்கள். அந்த அத்தனையூண்டு மூளைத்துணுக்கில் சுமார் ஒரு லட்சம் நியூரான்களும் அவைகளால் சேகரிக்கப்படும் நினைவுகள் சுமார் 2 மில்லியன் கிகாபைட்டுகள் என்றும் தெரியவந்திருக்கிறது.  ஒரு சிறிய எலியின் மூளையின் இந்த விதமாக கணிணிப்படுத்தி வெற்றி கண்டிருக்கிறார்கள் ஆராய்ச்சியாளர்கள்.

ஆனால், சிக்கலே இனிமேல் தான்.

ஒரு மனித மூளை முழுக்கவே சுமார் 2000 exabyte அளவிலான தகவல்களைச் சேமிக்க வல்லது. புரியவில்லை தானே?

ஒரு ஒப்பீட்டிற்குச் சொல்லவேண்டுமானால், நாம் தினந்தோறும் அணுகும் கூகுளின் மொத்த மெமரி 15 exabyte தானாம். கூகுள் தன்னிடம் உள்ள பல பணக்கார வாடிக்கையாளர்களுக்கு அவர்தம் நினைவுகளைச் சேகரிக்க உதவியிருக்கிறதாம். 

அவ்விதம் சேகரித்து சேர்த்து வைக்க ஆகும் செலவு ஒரு மாதத்திற்கு ஒரு மூளைக்கு சுமார் பத்து பில்லியன்கள். கேட்கவே தலைசுற்றுகிறது. இல்லையா? ஆனால் இந்தத் தொழில் நுட்பத்தின் சாதகங்கள் வியக்க வைக்கின்றன. இப்படி ஒரு உடலே இல்லாமல், வெறும் பிரஞை/மனத்தை நம்மால் ஒரு cloud storageல் சேமிக்க முடிந்தால்? அந்த மனம் ஆட்கொள்ள ஒரு இயந்திர உடல் தந்துவிட்டால்? என்றென்றைக்கும் இளமை சாத்தியம் தானே? மரணமற்ற வாழ்வும் சாத்தியம் தானே? அதுமட்டுமா? ஒளியின் வேகத்தில் பிரபஞ்சத்தின் எந்த மூலைக்கும் பயணித்துவிடலாம். எந்த கிரகத்திலும் குடியேறலாம். இல்லையா?

இதையெல்லாம் தெரிந்துகொண்ட பிறகு, கொஞ்சம் சீக்கிரம் பிறந்துவிட்டோமே என்று தோன்றாமல் இல்லைதான்.

அருவி மலர்

 அருவி மலரில் வெளியானது...

இருப்பினும்,

'ஆங்கில/அமெரிக்க விருதுகள் அங்கீகாரங்கள்' பகுதியில் சேர்க்க இன்னுமொரு பாயின்ட் சேர்ந்துவிட்டது. அதனை இங்கே தருகிறேன்.

2. Allegory Science Fiction, Fantasy & Horror Magazine has honored his work with an 'Honorable Mention' in its issue 46/73, 2024.

Note: This is yet to appear in the magazine.

Agora!

 Agora!

Agora ஒரு முக்கியமான திரைப்படம் என்பேன்.  அது கிருத்துவம் ஒரு மதமாக வேறூன்றத் துவங்கியிருந்த நேரம். அப்போது எப்படி கிருத்துவத்தின் வளர்ச்சி அப்போதைய அறிவுசார் தளங்களை அழித்தது என்பதைப் பேசும் கதை Agora.

இதில் வரும் Hypatia என்ற பெண் அப்போதிருந்த பூமியை மத்திமமாகக் கொண்ட Heliocentric model ஐ  கேள்விக்கு உட்படுத்தி ஆராய்வார். கிருத்துவம் அதைக் கடுமையாக எதிர்க்கும். தொடர்ந்து அவள் பணி செய்வதைத் தடை செய்யும் விதமாக, அந்த நூலகம் எரிக்கப்படும்.

அந்தக் காட்சிகள் தத்ரூபமாக, எப்படி மனித இனத்தின் பொக்கிஷங்களான நூல்கள் அழிந்தன என்பதைக் காட்டும் காட்சிகளாக அமைந்திருக்கும்.  

இஸ்லாம் இனங்களால் நாலந்தா, விக்ரமஷிலா அழிந்ததை , சீன ஹன்களால் தக்ஷஷீலா நூலகம் அழிந்ததை, பாரசீகர்களின் டெஸிபோன் நூலகம் அழிந்ததை, அலெக்ஸாண்டிரியாவின் செராபியம் நூலகம், இன்னும் இன்னும் பல நாடுகளில் பல நூலகங்கள் அழிந்ததை காட்சிப்பூர்வமாக ஆவணப்படுத்தும் விதத்தில் இந்தத் திரைப்படம் மிக முக்கியமான திரைப்படம் என்று கூடச் சொல்லலாம்.

ஒரு காலத்தில் எந்த நூல்களை நூலகங்கள் தேடித்தேடி அழித்தார்களோ, அதே நூல்களை, புராணக் கதைகளை இப்போது அவற்றின் வெகு மதியை உணர்ந்து தேடோ தேடென்று தேடிக்கொண்டிருக்கிறார்கள். கிடைக்க வாய்ப்பில்லை என்பதுதான் உண்மை.  

பூமியின் பூர்வீகம் குறித்த பல அகழ்வாராய்ச்சிகளை நடத்தியிருக்கும் போதிலும் ஒரு முக்கிய அகழ்வாராய்ச்சி மூக்கின் மேல் விரல் வைக்க வைத்திருக்கிறது. அது மனித மரபணுவில் பூமியின் சரித்திரத்தை, விலங்கின சரித்திரத்தை பின்னோக்கிச் செல்லுதல்.

இந்த விதமான ஆராய்ச்சியில் தெரிய வந்திருப்பது என்னவென்றால் பல மில்லியன் ஆண்டுகளுக்கு முன்பு கூட பூமியில் நாகரீகமடைந்த இனங்கள் வாழ்ந்திருக்கின்றன என்பதுதான். அப்படியானால் அவர்கள் யார்? இப்போது அவர்கள் எங்கே? நாமெல்லாம் யார்? அவர்களுக்கும் நமக்கும் என்ன தொடர்பு? இப்படிப் பல கேள்விகள் விடை தெரியவராமல் அறிவு சார் தளங்களைத் திணறடிக்கின்றன. பல மில்லியன் டாலர்கள் கொட்டி ஆராய்ந்து கண்டுபிடிக்க வேண்டி இருக்கிறது. அவர்கள் குறித்த தகவல் மத வளர்ப்பில் அழிந்த நூல்களில் இருந்திருக்கலாம் என்பது தான் அறிவியல் உலகின் பதைப்பாக இருக்கிறது. மத வளர்ப்பு குறித்து, இப்போது போல் வேறெப்போதும் மனித இனம் குற்ற உணர்வு கொண்டிருக்கவில்லை என்பது தெள்ளத்தெளிவு. மத வளர்ப்பு குறித்து செலவு செய்யப்படும் ஒவ்வொரு நாழிகையும், ஒவ்வொரு மனித ஆற்றலும் எதிர்காலத்தில் குற்ற உணர்வுக்கு மட்டுமே இட்டுச் செல்லும் என்பதும் திண்ணம்.

ஒரு மதத்தை, பிற மத நூல்களை அழித்து வளர்ந்தது எப்பேற்பட்ட தவறு என்பதை கடந்த சில நூற்றாண்டுகள் மனித இனத்துக்குப் புரிய வைத்திருக்கிறது எனலாம்.

நம் எல்லோருக்கும் ஒரு மதம் நிச்சயமாகத் தேவை என்றால் அது அறிவியல் மட்டும் தான் என்பதை இனி வரும் காலங்கள் நிரூபிக்கும் என்பதில் எள் அளவும் ஐயமில்லை. நாம் எத்தனை விரைவில் இதைப் புரிந்துகொள்கிறோம் என்பதை வைத்துத்தான் நம் மூளைச்சூடு தீர்மானிக்கப்படும்.

Halley's Comet!

 Comet Tsuchinshan அக்டோபர் 20 தேதி வரை வானில் தெரியும் என்கிறார்கள். அதன் வெகு நீ......ளமான சுற்று வட்டப்பாதையை (80000 ஆண்டுகள்) கணக்கில் கொண்டால் ஒப்பீட்டளவில் ஹாலீஸ் காமட்டின் 75 ஆண்டுகள் சுற்றுவட்டப்பாதை ஒன்றுமே இல்லை எனலாம்.

ஆயினும், ஹாலீஸ் காமட்டை கிரேக்கத்தில் கி.முக்கு முன்பே கண்டுவிட்டதாக பிரிட்டீஷ் நூலகத்தில் இருக்கும் பாபிலோனியன் குறிப்புகள் சொல்கின்றன. ஆனால், அப்போது அது மீண்டும் மீண்டும் பூமியை அண்மிக்கும் காமட் என்பது தெரியாமல் அதன் ஒவ்வொரு அண்மையையும் தனித்தனி காமட் வரவாகத்தான் குறித்து வைத்திருந்திருக்கிறார்கள்.

காமட் தெரிந்தால் ஏதோ அசம்பாவிதம் நிகழப்போகிறது என்கிற அளவில் மட்டுமே அப்போதைய புரிதல் இருந்திருக்கிறது. 

அதன் பிறகு வந்த கோபர்னிகஸின் கணக்குகள் தாம் விண்வெளியில் தோன்றும் கற்களின் துல்லியமான இருப்பிடம், பயணப்பாதை ஆகியவற்றைக் கண்டுபிடிக்கும் கணக்குகளை உள்ளடக்கி வெளிவந்தன. உண்மையில் இந்தக் கணக்குகள் தான் அப்போதைய விடிவெள்ளி எனலாம். இந்தக் கணக்குகள் மட்டும் இல்லையென்றால் விண்ணில் தோன்றும் பலவற்றைத் தொடர்புபடுத்த இயலாமல் எல்லாவற்றையும் தனித்தனி நிகழ்வுகள் என்கிற அளவில் புரிந்துகொண்டிருந்திருப்போம். கொபர்னிகஸ் தான் முதன் முதலாக சூரியமை மையமாகக் கொண்ட உலகை முன்மொழிந்தார்.

கோபர்னிகஸுக்கு ஒரு மாபெரும் சல்யூட்.

கோபர்னிகஸின் கணக்குகளின் அடிப்படையில் வளர்ந்த வானியலின் அடுத்தடுத்த கட்டமாக, ஹாலீ தான், 1531, 1607 and 1682 ஆகிய வருடங்களில் வந்த காமட்டின் வரவுகளில் உள்ள ஒற்றுமைகளை ஆராய்ந்து, அது அனைத்திலும் வந்தது ஒரே காமட் தான் என்பதைக் கண்டுபிடித்தார். அதனால் அந்தக் காமட்டுக்கு அவரது பெயரே சூட்டப்பட்டது. அவர் மட்டும் அதைக் கண்டுபிடித்திருக்காவிட்டால், ஒரே காமட்டை பல்வேறு பெயர்களில் நாம் அழைத்துக் கொண்டிருந்திருப்போம். 

எதிர்காலம்!!

 எதிர்காலம்!!

ஏதோ எதிர்காலத்திற்குள்ளேயே நுழைந்துவிட்டதைப் போலிருக்கிறது. 

டெஸ்லா humanoid robotகளை வெளியிட்டிருக்கிறார்கள். I, Robot படத்தில் இடம்பெரும் காட்சிகளைப் போலிருந்தது அந்த எந்திரங்கள் மனிதர்களுடன் பேசுவதையும், உரையாடுவதையும் பார்க்கையில்.

கல்லூரி மாணவர்களுக்கு உணவு எடுத்துச்செல்லும் இயந்திர டெலிவரி பாய்கள், உணவகங்களில் ஆர்டர் கேட்டு பரிமாறும் எந்திர சிப்பந்திகள் என்று திரும்பும் இடங்களிலெல்லாம் எந்திரங்களின் ஆக்ரமிப்பு தொடர்கிறது.

இனி வரும் காலங்களில், எந்திர மனிதர்களால் மட்டுமே  நடத்தப்படும் உணவகங்கள், கடைகள், வரவேற்பறைகள் என்று இது இன்னும் அடுத்தடுத்த கட்டங்களுக்குப் பயணிக்கும் என்பது போலத்தான் தெரிகிறது. 

அமெரிக்காவில் இது வந்துவிட்டால் இந்தியாவுக்கு இது வர ஒரு பத்தாண்டுகள் ஆகலாம். 2035களில் இந்தியாவிலும் முழுக்க முழுக்க இயந்திரங்களால் நடத்தப்படும் மால்கள், உணவகங்களைப் பார்க்கலாம் என்றே தோன்றுகிறது.

இன்னொரு பக்கம், "உணவகங்கள் நவீனமாகிவிட்டன, உணவுகள் நஞ்சாகிவிட்டதே"  என்கிற கூக்குரலும் கேட்டபடிதான் இருக்கிறது. இது இப்படித்தான் தொடர வேண்டுமா என்ற சோகம் இருக்கிறதுதான். நாம் எல்லோரும் முயன்றால், இந்தக் கதையின் அடுத்த கட்டம் வேறு விதமாகவும் இருக்கலாமே என்ற குரல் எனக்குள்ளும் ஒலிக்கிறதுதான்.

இந்தக் கூக்குரலில் உங்கள் குரலும் அடங்கும் என்று நீங்கள் நினைத்தால், இதைப் படியுங்கள்.

சமீபமாக ஒரு புத்தகக் கண்காட்சிக்குச் சென்று வந்த நண்பர் சொல்கிறார்.

"பிரிண்டிங் ப்ரஸ் வீணாயிடக்கூடாதுன்னு கண்டதையெல்லாம் பிரிண்ட் அடிச்சு புக்குன்னு விக்கிறாய்ங்க. எழுதின எவனுக்கும் எந்தப் பயிற்சியும் இல்ல. ஆக, நாலு நல்ல நூல்களைச் சுத்தி நாலாயிரம் குப்பை இருக்கு.. புதுசா வாங்க வர்றவன் நல்லதுன்னு எப்படிக் கண்டுபிடிப்பான்?" 

கிட்டத்தட்ட இதே வாதத்தைத்தான் உணவகங்களுக்கு மட்டுமல்லாமல் ஏனைய எல்லாவற்றுக்கும் சொல்ல வேண்டி இருக்கிறது. மட்டமான, ஆயுள் குன்றிய டிம்பர்களை வைத்து வீடு கட்டுகிறார்கள். 

"நான்கு நல்ல கட்டுமானங்களைச் சுற்றி நாற்பதாயிரம் மோசமான கட்டுமானங்கள்"

"நான்கு நல்ல உணவுப் பொருட்களைச் சுற்றி நாற்பதாயிரம் மோசமான உணவுகள்"

இப்போதெல்லாம் இந்த வாசகம் டெம்ப்ளேட் ஆகிவிட்டது...

"நான்கு நல்ல ................... சுற்றி, நாற்பதாயிரம் மோசமான .........." இதுதான் அந்த டெம்ப்ளேட். கட்டுமானங்களை, உணவகங்களை கூக்குரலிடும் நாம் தான் நடத்துகிறோம். நமக்காகத்தான் நடத்துகிறோம். "நாம மட்டும் தான் செய்யறோம், எல்லாரும் பண்றாங்க. நமக்காக கொஞ்சம் நாமளும் செஞ்சிக்கிட்டா தான் என்ன?" என்ற சமாளிப்புடன் நமக்கு நாமே ஒருவருக்கொருவர் செய்துகொள்வதன் ஒட்டுமொத்த பக்க விளைவு தான் இப்போது நடப்பது எல்லாமும்.

 

நமக்கெல்லாம் "உணவகங்கள் நவீனமாகிவிட்டன, உணவுகள் நஞ்சாகிவிட்டதே" என்று சொல்ல என்ன தகுதி இருக்கிறது? 

பிக் பாஸ் - நாள் 4

 பிக் பாஸ் - நாள் 4

"இவர் அச்சுறுத்தலாக இருப்பார்..என்னுடைய கேமுக்கு இடைஞ்சலா இருப்பார்.. அதனால இவரை நான் நாமினேட் பண்றேன்.."

பிக் பாஸ் நிகழ்ச்சியின் மிகவும் பிரபல்யமான வாசகம் இதுவாகத்தான் இருக்கும்.

வாழ்க்கையின் அடி நாதமே இதுதான். 

நம்மை எல்லோரும் எளிதில் ஏற்றுக்கொள்கிறார்கள் என்றால், அதன் பொருள், நாம் யாருக்கும் அச்சுறுத்தலாக இல்லை என்பதுதான். பெண்களில் அழகும், ஆண்களில் அறிவும், திறமையும் மற்றவர்களிடமிருந்து வெறுப்பைச் சம்பாதித்துத் தரும்.

ஒருவர் தனித்து இருக்கிறார் என்றால், அவர் introvert ஆக இருக்கிறார் என்பது முழுக்காரணமல்ல. அவர் மற்றவர்களால் இயல்பாக ஏற்றுக்கொள்ள முடியாத இடத்தில் இருந்தாலும் இந்தத் தனிமைப்படுத்தப்படுதல் நடக்கும். திட்டமிட்டு அவரை தனிமைப்படுத்துவார்கள். குறை கண்டுபிடிக்க முயல்வார்கள். ஒன்றுமில்லாததை ஊதிப் பெரியதாக்குவார்கள். பார்த்தும் பாராதது போல் கடந்து போவார்கள். கவனித்தும் கவனியாதது போல் நடிப்பார்கள். 

'உலகம் உன்னை ஏற்றுக்கொள்ள வேண்டும்' என்கிற வாசகமெல்லாம் இங்கே அர்த்தமற்றது. இன்னும் சொல்லப்போனால், இது திட்டமிட்ட சதியை உள்ளடக்கிய ஒரு வாசகம். சம்பந்தப்பட்டவர் சூதனமாக நடந்துகொள்ள வேண்டும். 

இதை நிஜ வாழ்வில் நம்மைச் சுற்றி நாம் வெகு இயல்பாக அவதானிக்கலாம். இன்னும் சொல்லப்போனால் if you know, you know மாதிரியானது தான் இது. தனித்துவமான திறனோ, வசீகரமோ இல்லாதவர்களுக்கு இவைகளெல்லாம் பெரும்பாலும் நடப்பதில்லை. ஆக இப்படி ஒரு உலகம் இருக்கிறது என்பதே அவர்கள் அறியாமல் இருப்பார்கள். அப்படிப்பட்டவர்களால் சமூக இயக்கங்களைத் துல்லியமாகப் புரிந்துகொள்ள முடியாது. அவர்கள் ஏன் பிரகாசிக்கவில்லை என்பதற்கு, இதுவும் ஒரு காரணம்.

நடிகர்/நடிகைகளை திரையில் காணும் வரை ஏற்றுக்கொள்ளும் சமூகம், வாடகைக்கு வீடு கேட்டு வந்தால் ஏற்கமாட்டார்கள். ஒரு பள்ளிக்கூடத்தை எடுத்துக்கொள்ளுங்கள். கடைசி பெஞ்சில் அமர்ந்திருப்பவர்களுக்கு இயல்பாகவே முதல் பெஞ்ச் மாணாக்கர்களைப் பிடிக்காது. இதெல்லாம் ஒரு உதாரணம் தான். இப்படி சொல்லிக்கொண்டே போகலாம். 

இது எல்லாவற்றையும் மீறி, அழகாகவோ, தனித்திறமைகளுடனோ தொடர்ந்து நீடிப்பவர்கள், தொடர்ந்து இயங்குபவர்கள், மென்மேலும் வெற்றியை சுகிப்பவர்கள் உண்மையிலேயே GOAT தான்.  மற்றவர்கள், அவர்களை வெறுத்து தனிப்படுத்த எண்ணுவதற்கு பதில், அவர்களிடமிருந்து எப்படிக் கற்றுக்கொள்ளலாம் என்று யோசிப்பது ஒரு நல்ல மார்க்கம் என்பது என் வாதம்.

ஏனெனில், எத்தனை தான் தனிப்படுத்தினாலும், இப்படியானவர்கள் மீண்டும் எழுந்து நின்றுவிடுவார்கள். எப்படியும் அவர்கள் எழுந்து நிற்கத்தான் போகிறார்கள் என்றால், அவர்களைப் பகைத்துக்கொள்வானேன், மொக்கை வாங்குவானேன். 

அதற்கு பதில், அவர்களிடமிருந்து கற்றுக்கொள்ளலாம் அல்லது அவர்களை இணைத்துக்கொண்டு எப்படி இயங்குவது என்று யோசிக்கலாம். 

பிக் பாஸ் - நாள் 3

 பிக் பாஸ் - நாள் 3

மனித குலம் நாகரீகமடைய அடைய, தனக்கென விதிகளை வகுத்துக்கொள்கிறான் மனிதன். ஆனால், இயற்கையின் விதிகளே இறுதியானவை.

நாளையே ஒரு விண்கல் மொதி இந்த பூமியில் மனித இனம் பேரழிவைச் சந்திக்குமானால் பிழைக்கப்போவது, உணவை உருவாக்கத்தெரிந்த, விவசாயம் தெரிந்த, காடுகளிலும் மேடுகளிலும் வாழப் பழகியவர்களே என்பதில் எள் அளவும் ஐயமில்லை.

அப்படியோரு பேரழிவில், ஆனந்த் அம்பானியை விடவும் அவரது வேலைக்காரர் பிழைப்பதற்கான சாத்தியக்கூறுகளே அதிகம். (இந்தப் பின்னணியில் அவரது ஐயாயிரம் கோடி திருமணம், ஒரு ஜோக். அவ்வளவுதான்)

எதிர்கால, உலகிற்கு, எந்த மனிதன், தன் பிழைப்புக்குத் தேவையான அத்தனையையும் தானே செய்யத்தெரிந்து வைத்திருக்கிறானோ அவனே தேவைப்படுவான். Fermi paradoxற்குத் தரப்படும் விளக்கங்களில் பிரதானமானது, ஒரு கட்டத்துக்கு மேல் நவீனப்படும் முன், அந்த இனமே அழிந்துவிட நேர்வது தான், பிரபஞ்ச வெளியில் வேற்று கிரக வாசிகளை நாம் இதுகாறும் எதிர்கொள்ளாததற்குக் காரணம் என்பதுதான்.

'பிக் பாஸ் தான் என் பலம்' என்று சொல்லவே செய்கிறார் ரவீந்தர். என்ன எதிர்பார்க்கிறார்? தன்னுடைய 7 சீஸன் விமர்சன அறிவுக்காக மற்றவர்கள், தான் செய்யவேண்டிய உடல் உழைப்பு கோரும் வேலைகளைத் தனக்காக செய்வார்கள் என்றா? இப்படித்தான் சாதிகள் கட்டமைக்கப்பட்டது.

ஒரு தளத்தில், பிழைக்கத்தேவையான அத்தனையையும் ஒரு மனிதன் தன்னக்குள்ளாக சுவீகரித்துக் கொண்டிருக்க வேண்டும். அதுவே சாதிப் பாகுபாடுகளை அழிக்கும் வழி. அப்படிக் கொள்ளாதவர்களை, ஒரு சமூகம், அவரின் நலனுக்காக, சுவீகரிக்க ஊக்குவிக்க/கட்டாயப்படுத்த வேண்டும். நல்ல ஆரோக்கியமான சமூகங்களுக்கான அடையாளமாக இதனைச் சொல்லலாம்.

கிரிக்கெட் போன்ற விளையாட்டுக்களைக் கூட 'Its a brain game' என்பார்கள். இல்லை. ஒரு கூட்டம் ஒரு விளையாட்டின் கடிவாளத்தைத் தன் கரத்திலேயே வைத்திருக்கச் சொல்லும் போலி வார்த்தைகள் தான் அவை. அந்த வார்த்தைகளில், உலகின் ஜனத்தொகையில் இரண்டாவதாக இருக்கும் நாடு வீழ்ந்தது துரதிருஷ்டமே. பிக் பாஸ் 8வது சீசனில் காணப்படும் அதே துரதிருஷ்டம்.

Boys or girls போட்டியில் இயற்கையின் விதிகளை மறந்துவிட்டார்களோ என்று தோன்றுகிறது.

மரபணுக்கள் சிறுகதைத் தொகுப்பு நூல் - படைப்பு சங்கமம் - 2024 காணொளி

 படைப்பு பதிப்பகம் வெளியிடும் எனது அடுத்த விஞ்ஞானப் புனைவுச் சிறுகதைத் தொகுப்பு நூலான 'மரபணுக்கள்' நூலுக்கு படைப்பு சங்கமம் - 2024 நிகழ்வில் வெளியிடப்பட்ட காணொளி.

பொருத்தமான படங்களுடன், இனிமையான இசையுடன் மிக அழகான காணொளியாக வந்துள்ளது. படைப்பு பதிப்பகத்தாருக்கு எனது நன்றிகள்.

https://www.youtube.com/watch?v=KjCPO6N5cLs

நூல் வாங்க தொடர்புக்கு:
----------------------------------------
அலைபேசி எண்: 7338897788 / 91 97908 21981
நூல் விற்பனை பொறுப்பாளர்கள்: ரூஃபஸ் வி ஆண்டனி / சலீம் கான்(சகா)

PADAIPPU KUZHUMAM,
No. 3, Ground Floor,
Ajantha Towers,
Corporation colony Street,
Kodambakkam, Chennai - 600 024
Mobile : +91 73388 97788 / 73388 47788

பிக் பாஸ் - நாள் 1

பிக் பாஸ் - நாள் 1

சாச்சனா முதல் ஆளாக, இருபத்து நான்கு மணி நேர இவிக்ஷனில் வெளியேறியிருக்கிறார்.

எதார்த்தமாக, மிகவும் அப்பாவித்தனமாக அவர் பகிர்ந்து கொண்ட ஒன்றை வைத்தே அவரை eliminate செய்திருக்கிறார்கள் போட்டியாளர்கள். இனி அவர் 'விழித்துக்கொள்வார்' என்று நம்பலாம். பார்க்கப்போனால் இது ஒரு சுழற்சி தான். ஏதாவது ஒரு கட்டத்தில் அப்பாவித்தனம் உதிர வேண்டும் அல்லவா? அந்த  'நல்ல' காரியத்தைத்தான் போட்டியாளர்கள் செய்திருக்கிறார்கள் என்பதுதான் உண்மை. சாச்சனா இதிலிருந்து கற்றுக்கொள்ள வேண்டும். நம்மில் எல்லோருக்குமே இது ஏதாவது ஒரு கட்டத்தில் நடந்திருக்கும். அப்போதுதான் 'விழித்திருப்போம்'. அந்த வகையில் போட்டியாளர்களுக்கு நன்றிகளைச் சொல்வோம்.

இதில் சாதகமான விஷயம், அவரது இருபத்துயோரு வயது.

ஒரு தோல்வி நம்மை என்ன செய்கிறது என்பதில் தான் நாம் யார் என்பதையும் உலகம் தெரிந்துகொள்ளும். இந்தப் புள்ளியில் இரண்டே outcome தான். இந்தத் தோல்வியில் சாச்சனா துவண்டு காணாமல் போவதும், அதை விடவும் வலுவாக அடுத்த கட்டம் எடுத்து வைப்பதும் தான். 

இளம் வயதில் தோல்விகள் நம்மைப் பக்குவப்படுத்தும் என்பது என் வாதம் மட்டும் பார்வை. அந்தக் காரணத்தால், விரும்பியே தோல்வியைத் தழுவுங்கள் என்பேன். முதல் பாதி கடினமாக இருப்பவருக்கே இரண்டாம் பாதி நன்றாக இருக்க வாய்ப்பு அதிகமிருக்கிறது.  

பள்ளி, கல்லூரிகளில் மிகப்பெரிய அளவில் bullyingஐ சந்தித்திருக்கிறேன். என் வகுப்பில் படித்தவர்களுக்கு என் குறித்து, 'இவனெல்லாம் வேஸ்ட்' என்கிற அளவில் தான் ஒபினியன் இருந்தது என்பது எனக்கே தெரியும். என் முகத்துக்கு நேராகவே சொல்லியிருக்கிறார்கள். 'நாம வேஸ்ட் தானோ' என்று என்னையே கேட்டுக்கொண்ட நாட்களும் இருந்திருக்கின்றன. 

இன்று சாச்சனா அழுகையுடன் பிக்பாஸ் வீட்டை விட்டு வெளியேறியது, கல்லூரியில் கடைசித் தேர்வை எழுதிவிட்டு ஈர்மான கண்களுடன் வெளியேறிய என்னையே திரும்பிப் பார்த்தது போலிருந்தது.

நாள்பட நாள்பட தான் புரிந்தது, எல்லோருமே, பிறிதேதோ ஒருவரின் கண்களுக்கு 'வேஸ்ட்' ஆகத்தான் இருக்கிறார்கள். எல்லா தரப்புக்கும் ஒரு எதிர் தரப்பு இருக்கிறது. பறவைகள் பலவிதம். சாச்சனா இன்று தன் எதிர்தரப்பைப் பார்த்திருக்கிறார். 

ஒரு சிறுகதை எழுதுகிறோம். எல்லோருமா வாழ்த்துகிறார்கள்? குறை சொல்பவர்களும் இருப்பார்கள். அந்தக் குறைகள் என்ன என்பதை மட்டும் தான் நாம் தெரிந்துகொள்ள வேண்டும். அந்தக் குறைகளின் மீது வேலை செய்ய வேண்டும். அந்தக் குறையின் தீவிரத்தைப் படிப்படியாகக் குறைக்க வேண்டும். அதன் மீது நம் உழைப்பை நல்க வேண்டும். இப்படியெல்லாம் செய்தால் வெற்றி கூடும் என்று அர்த்தமில்லை. வெற்றி நம் கையில் இல்லை, அது இயற்கையின் கையில். எப்போது எங்கு யாருக்கு வெற்றியைத் தர வேண்டும் என்பது அதன் கணக்காகிறது.

நம் வேலை உழைப்பை நல்குவது மட்டுமே என்று தான் சொல்கிறேன்.

சாச்சனா அதைச் செய்வார் என்று நம்புகிறேன்.