Wednesday, 29 June 2016

பிரியமின்மை கவிதைகள்

பிரியமின்மை கவிதைகள்

என்னை 
கொஞ்சம் கொஞ்சமாக‌
சிறுகச்சிறுகத்தான்
அழிக்க நினைக்கிறாய் நீ...
நான் தான்
அதை உணர்ந்தது முதல்
மிக வேகமாக 
அழிந்துகொண்டிருக்கிறேன்...
 - ஸ்ரீராம்



உனது ஆகச்சிறந்த‌ ஆயுதங்களுடனும்
என்னை எதிர்கொள்ளும் உன்னை
நிராயுதபாணியாகத்தான்
எதிர்கொள்கிறேன் நான்...

பிணங்களை 
எந்த ஆயுதத்தாலும்
வெல்ல முடியாது 
என்பது நீ அறியாததா?...
 - ஸ்ரீராம்


நானற்ற உன் நொடிகளை
தெரிந்துகொள்ள விரும்புகிறேன்..
எனக்குள் லேசாக தலைக்கனம்
எழுகிறபோதெல்லாம்...
 - ஸ்ரீராம்


உன் மீதான‌
என் பிரியங்களை
எப்படியேனும் மலடாக்கிட‌
முயல்கிறேன்...
அவைகள் பல்கி பெறுகுவதில் தான்
எத்தனை சிரமங்கள் உனக்கு...
 - ஸ்ரீராம்



ஒரே ஒரு துளி விஷம் தான்...
என் பால் கோப்பையில் கலந்திட‌
உனக்கு எத்தனை நேரமாகும்?
அதை நான் பருகிவிட‌
எனக்கு  எத்தனை நேரமாகும்?
அந்த சில நொடிகளுக்குத்தான்
என் அன்பை காட்ட
வாய்ப்பளிக்கிறாய் நீ...


 - ஸ்ரீராம்

No comments: